KUCHING: Sarawak meseti nempa rentayan dikena nyungkak pengulih asil lada enggau meri mayuh penguntung ngagai pekebun.
Sapit Menteri Nembiak, Lumba enggau Pemansang Orang Dagang ke mega Kaban Kunsil Nengeri (ADUN) Layar, Datuk Gerald Rentap Jabu madah, menua tu ngembuan mayuh pemansut lalu enda ibuh bepanggai ba pemakai import.
“Kitai diberekat laban ngembuan gaya hari, klimet enggau tanah ti manah.
“Tambah mega, lada burak bekrim pemadu manah datai ari Betong empu ke diatu berega RM22 sekilogram.
“Tu jereki ti manah lalu meri pangka besai ngagai mensia mayuh.
“Nya kebuah, kitai meseti nempa rentayan ngelaku prpduk lada tu dikena nempa kuasa ekonomi kediri dalam industri tu.
“Uji kitai berunding enti semua Pulau Borneo nyengkaum Sabah, Sarawak enggau Kalimantan ke bisi 30 juta peranak meli lada ninting bulan, berapa mayuh asil ulih diempu kitai,” terang iya.
Rentap mansutka jaku nya lebuh dirandau pemberita pengudah ngabas kebun lada chelum di Nanga Jelau, Layar di Betong, kemari.
Ku iya, raban ti ngemujur inisiatif tu iya nya pedagang biak laban sida pintar teknologi enggau ngelaku chara baru.
“Kitai bela nemu rega lada majak niki enggau peminta mega nambah,” ku iya.
Ngelansa pasal pejalai ngabas kebun lada nya, Rentap madahka nya plot kedua Kaunsil Lada Malaysia (LLM) pengudah Sri Aman ba pengawa mansik peneguh ngena tiang paip Polyvinyl Chloride (PVC) dikena nukar tiang tebelian ba pengawa nanam lada.
“Pengawa ngena tiang paip nyadika tuat lada tu inovasyen dikena ngiga kereban bukai nukar tiang tebelian laban begunaka besai belanja kelimpah pedis digiga.
“Naka diatu, chara nya ngayanka asil positif enggau mujur nyengkaum ngetanka pemansut lada enggau asai ti sebaka.
“Tang, raban LLM Pampang Betong agi mansik pekara tu,” terang iya.
Pengawa ngena tiang kayu tebelian nya chara lama ti udah dikena enggau ditampung mayuh pekebun kenyau ari kelia.
Taja pia, asil pansik inovasyen tuat lada ti dipejalai pegawai pemansik LLM, pemansik mega udah tetemuka chara bukai ti engkeman agi nyadi tuat lada.
Kelimpah ari nya, inisiatif tu mega dipejalai berindik ari kayu tebelian enda ulih ngelimat belanja laban mayuh begunaka tuat lada ba pengawa nanam lada.
Rega kayu mega niki lalu nya entara kebuah ungkus betanam betupi nambah kelimpah nating pekebun mansang ba pengawa nya.
